वनाचे श्‍लोक

दिंनाक: 05 Jun 2020 11:57:29


 

द्रोण, पत्रावळ, पळसाची

पाने कर्दळ वा केळीची

भोजनपात्रेही अपुली

असे देणगी झाडांची॥

 

प्रेम, आदर, कृतज्ञता,

श्रृंगार, सजावट वा पूजा,

पर्याय आम्हा सार्‍यांसाठी

फुलांवीण नाही दुजा॥

 

कापूस, काथ्या, सुतळ, ताग वा

घायपात, भेंडी, अंबाडी

नैसर्गिक हे तंतू-धागे

आम्हा देती वनस्पती॥

 

भूर्जपत्रे ते कागद आणि

बोरू, कुंचले, रंग अन् शाई

वृक्षसंपदांनीच बहरली

लेखन, चित्रकला अपुली॥

 

भोजनोत्तर मुखशुद्धीला

पाने गुंज नागवेलींची

जोड तयांना कात सुपारी

केसर, लवंग, वेलचीची॥

 

फळाफळांचे स्वाद निराळे,

रंग, रूप आकार वेगळे,

संस्कृतीत देशो-देशीच्या

स्थान तयांना असे वेगळे॥

 

या तंतूंनी बनली अपुली

वस्त्रे, प्रावरणे, सुखशैय्या,

दोर, शिडे अन् गलबतांची

जाळी मासे पागाया॥

 

बैठक, दर्भासन, चटई

चौरंग, पाट किंवा खुर्ची

मेज, अडणी अथवा निवई

देण आम्हा वनस्पतींची॥

 - शुभांगी योगेश कापसे, साहाय्यक शिक्षिका, जनता विद्यामंदिर प्रशाला, दहिवली.

---------------------------------------------------------------------------------------------------------------------------